Арассыыйаҕа дьиэ кэргэн, Саха өрөспүүбүлүкэтигэр оҕо саас, Нам улууһугар оҕо спордун, Фрунзе нэһилиэгэр дьиэ кэргэн сомоҕолоһуутун сылларынан нэһилиэкпит дьонугар-сэргэтигэр олоҥхо уонна хомус күннэрин чэрчитинэн оҕолорго уонна улахан дьоҥҥо тэрээһиннэр буолан аастылар. «Олоҥхо дойдута» тэрээһиҥҥэ нэһилиэкпит киэн туттар олоҥхоһуттарын П.П.Ядрихинскай-Бэдьээлэ уонна Е.Г.Охлопков-Буоратай бюстарын аттыларыгар олоҥхо кинигэлэрин быыстапката турда. Оҕолор олоҥхону, хомуһу кытта билистилэр, олоҥхону көрдүлэр-иһиттилэр, уруһуйдаатылар. «Олоҥхо дойдутугар өбүгэ оонньуулара» дьиэ кэргэҥҥэ өбүгэ оонньууларыгар күрэх буолла. Күрэх түмүгүнэн Василиса, Николай Саввиновтар 1 миэстэ, Акулина, Иван Саввиновтар 2 миэстэ уонна Матрена кыыһынаан Аня Ядрихинскайалар 3 миэстэ буоллулар. Көхтөөх кыттыыны ылбыт дьоммутугар махталбытын тиэрдэбит.