Муҥха – саха омук төрүт үгэһэ. Улахан күөллэргэ сэтинньи ыйтан саҕаланар. Муҥха биир күн эбэтэр 2-3 күн уһаан-тэнийэн буолуон сөп. Күөх Боллох бэлэҕин үллэстии кэмигэр күөлгэ киирбит дьон бары балыкка тиксиэхтээхтэр. Ол былыргы сокуон күн бүгүнүгэр диэри кытаанахтык тутуһуллар. Ити – саха омук кыаммат-түгэммэт араҥаҕа харыстабыллаахтык, кыһамньылаахтык сыһыаннаһыытын чаҕылхай туоһута.

Ол курдук нэһилиэкпитигэр алтынньы ый 28-29 күннэригэр нэһилиэк уопсай муҥхата буолан ааста. Маҥнайгы күн «Чэйдээх», «Араҥас биэ», «Туора күөл» эбэлэргэ, иккис күн «Соҕотох бэс», «Кутаакы» эбэлэргэ муҥха түһүүтэ буолла.